INFORMACIÓN E BASES

Esta nova edición do noso Concurso de Bandas Emerxentes mantén a esencia das que a precederon, buscando igualmente dar unha plataforma a grupos da bisbarra para darse a coñecer e desta forma fomentar o desenvolvemento do panorama musical da nosa zona. Non entanto, incorporamos un cambio no formato, combinando plataformas dixitais e música ao vivo, estreando unha fase final en directo, un verdadeiro festival no que as últimas bandas en pé no concurso pasarán polo escenario para mostrar os seus proxectos.

É unha maneira de chamar aínda máis a atención do público e unha oportunidade aínda maior para esas agrupacións que buscan facerse un oco no circuíto de concertos galego, pois non sempre é fácil atopar espazos nos que darse a coñecer. Durante a xornada de música que estes novos talentos ofrecerán, a xente presente poderá votar os seus grupos preferidos e, xunto co voto dun xurado, escolleremos á banda gañadora, que terá a oportunidade de tocar no Festival Rock in Rian 2024. Para rematar, unha banda profesional e un pincha-discos, tamén da zona e en galego, pecharán este evento por todo o alto.